Rungu la Bodi ya Mikopo latua Dawasco

Bodi ya Mikopo ya Elimu ya Juu (HELSB) imetangaza azma ya kuifikisha mahakamani Kampuni ya Majisafi na Majitaka Dar es Salaam (Dawasco) kama isipolipa deni lake la shilingi milioni 124 ndani ya siku 7

Hiyo ni fedha ambayo Dawasco wanadaiwa na bodi hiyo ikiwa ni malimbikizo ya makato ya wadaiwa ambao Dawasco imewakata lakini imeshindwa kuyawasilisha katika bodi hiyo

Kaimu Mkurugenzi Msaidizi wa Urejeshaji Madeni kutoka Bodi ya Mikopo amesema Dawasco wametenda kosa kisheria kushindwa kuwasilisha fedha hizo licha ya kuwa wamekwishawakata waajiriwa wanaodaiwa na bodi hiyo.

Pia ametoa onyo kwa waajiriwa wa mashirika, taasisi, na makampuni mbalimbali kuhakikisha kuwa wanawasilisha fedha hizo kwa wakati bila kufuatiliwa na bodi.

Tangu kufanyika kwa mabadiliko ya kisheria ya kiwango cha makato kutoka asilimia 8 hadi asilimia 15, bodi ya mikopo imeweza kukusanya shilingi bilioni 12 kwa mwezi mmoja pekee kutoka kiasi cha shilingi bilioni 2 kwa mwezi kabla ya kubadilika kwa kiwango hicho cha makato.